Akamanyitso K'ekinyamaishwa Nikaahi?
Hoona akamanyitso k’ekinyamaishwa nookamanya?
Obaire nookimanya ngu Ruhanga aine akamanyitso akarikuranga abahereza be?
Abantu baingi baine entebereza zitarikushushana aha bikwatiraine n’akamanyitso k’ekinyamaishwa. Mbweenushi tugire ngu ni Baakodi ya computer? Nika kompyuta chipu shi? N’enamba erikuranga abantu nka Aaduhaara y’omuri India? Mbweenu shi tugire ngu ninka taatu nibakakuteera aha mubiri?
N’obaasa kuba oine entekateeka yaawe nk’omuntu ah’akamanyitso k’ekinyamaishwa, kwonka shi noogyira ngu ohikire? Kwonka shi ebyo byona bikiri aho, waarashomire eki Baibuli erikukashobororaho?
Nakushaba shoma buri mushororongo obone ansa ehikire
Manya eki: Ekitabo ky’Okushuuruurirwa nikigamba aha bintu bina birikukwata aha kinyamaishwa, haza bitarikushushana:
- Akamanyitso k’ekinyamaishwa
- Ekishushani ky’ekinyamaishwa
- Enamba y’ekinyamaishwa
- N’eiziina ry’ekinyamaishwa.
Ekyegyeso eki, nikishoborora ah’akamanyitso k’ekinyamaishwa koonka, tikirikugamba aha namba y’ekinyamaishwa, eri magana mukaaga na makumi mukaaga na mukaaga, enamba y’ekinyamaishwa n’akamanyitso k’ekinyamaishwa, neebintu b’ibiri bitarikushushana.
Akamanyitso aka nikashangwahi?
Okushuuruurirwa 13:16:
Kandi abantu boona, abato n’abakuru, abatungi n’abooro, ab’obusingye n’abahuuku, yaabaragiira kuteebwa akamanyitso aha mukono gwa buryo, nari aha buso;
Abataine kamanyitso k’ekinyamaishwa bakaremetsibwa kukoraki?
Okushuuruurirwa 13:17:
Ngu hatabaho owaagura nari owaatunda, kureka ogwo oine ako kamanyitso, nari eiziina ry’ekinyamaishwa, nari enamba y’eiziina ryakyo.
Abataine kamanyitso ka Ruhanga baryafubirwa bata?
Okushuuruurirwa 14:9-11:
Maraika ondiijo owa kashatu yaakurataho, naagamba n’eiraka rihango ati: Omuntu weena, orikuramya enyamaishwa n’ekishushani kyayo, akateebwa akamanyitso kaayo aha buso bwe nari aha mukono gwe, ogwe nawe aryanywa ah’amarwa g’ekiniga kya Ruhanga, agaashukirwe omu kikopo ky’okubiihirwa kwe agatafungwire, kandi aryabonabonesibwa n’omuriro n’obuganga bw’ekibiriiti omu maisho g’Omwana gw’entaama. Omwika gw’okubonabonesibwa kwabo gucumbuuka ebiro n’ebiro; abo abaramya enyamaishwa n’ekishushani kyayo, n’omuntu weena oteebwaho akamanyitso k’eiziina ryaayo tibahuumura ny’omushana na ny’ekiro.
Haine ekindi ekirahike ahari abo abaine akamanyitso k’ekinyamaishwa?
Okushuuruurirwa 16:2:
Maraika ow’okubanza yaagyenda, yaashuka orwabya rwe aha nsi; abantu abaabaire baine akamanyitso k’ekinyamaishwa nibaramya ekishushani kyakyo, baakwatwa ebironda bibi ebirikunuuka.
Ruhanga naija kushuumbusha ata, abahereza be abaarayange akamanyitso k’ekinyamaishwa?
Okushuuruurirwa 20:4:
Kandi naareeba ebitebe by’obukama; abaabaire babishutamiho baaheebwa obushoboorozi bw’okucwa emanja. Kandi naareeba emyiisyo y’abo abaatemirweho emitwe nibaturwa okuba abajurizi ba Yesu n’ekigambo kya Ruhanga, kandi abatararamize enyamaishwa n’ekishushani kyayo, n’obukwakuba okwiikiriza kuteebwa akamanyitso kaayo aha buso bwaabo, nari aha mikono yaabo. Baagaruka baaba abahuriire, baayema na Kristo okumara emyaaka rukumi.
Aha muheru gw’egi myaaka, abantu babiri nibaija kukwatanisiza hamwe, babaihe kandi bategyeke ensi yoona. Abantu abo nibaahi?
Okushuuruurirwa 19:20:
Enyamaishwa egyo yaakwatwa hamwe n’omurangi w’ebishuba, owaabaire akora obumanyitso omu maisho gaayo, naabaihabaihisa abo abaine akamanyitso k’ekinyamaishwa n’abarikuramya ekishushani kyakyo. Abo bombi baanagwa omu nyanja erikwakamu omuriro n’obuganga bw’ekibiriiti bahuriire.
Ekinyamaishwa nikiiha nkahi obushoboorozi bwaakyo?
Okushuuruurirwa 13:14:
Kandi baaramya ekijoka Ahabw’okuba kikaha ekinyamaishwa obushoborozi bwakyo; baaramya enyamaishwa egyo nibagira bati: “N’oha orikushusha enyamaishwa egi?” “Kandi n’oha owaakubaasa kugirwanisa?”
Ekijoka nikimanyisaki?
Okushuuruurirwa 12:9:
Ekijoka ekyo ekihango ekya ira, ekikwetwa Omuregi kandi Sitaani, orikubaiha ensi yoona, yaanagwa aha nsi hamwe na baamaraika be.
Ekinyamaishwa nikyaija kweeyeta Ruhanga?
2 Abatesalonika 2:3-4:
Hatagira omuntu owaababaihabaiha omu muringo gwona; ahakuba ekiro ekyo tikiriija, hatakabandize kubaho okutaana na Ruhanga, omuntu ogwo omugomi akashuuruurwa, niwe mwana w’okuhwerekyerera, kandi omuzigu oyetunguura, akarwanisa ekintu kyona ekyetwa Ruhanga nari ekiramibwa, akashutama omuri hekalu ya Ruhanga, naayeyeta Ruhanga. Garuka oshome Ezekieli 28:2 na Danieli 11:37.
Abantu nibaija kuramya ekinyamaishwa?
Okushuuruurirwa 13:4:
Kandi baaramya ekijoka Ahabw’okuba kikaha ekinyamaishwa obushoborozi bwakyo; baaramya ekinyamaishwa nibagira bati: N’oha orikushusha nk’enyamaishwa egi? Kandi n’oha owaakubaasa kugirwanisa?
Abararamye ekinyamaishwa, nibaija kuhenda ekiragiro kya Ruhanga ky’okubanza?
Ebiragiro 5:6-7:
“Niinye MUKAMA Ruhanga waawe owaakwihire omu nsi ya Misiri, omu nju y’obuhuuku; otarigira baaruhanga abandi nyowe ndiho.”
Omurangi w’ebishuba naija kugambira abantu kukoraki?
Okushuuruurirwa 13:14:
Ahabw’obumanyitso obwo obu yaahairwe kukorera omu maisho g’enyamaishwa, yaabaihabaiha abatuura omu nsi, ngu bakore ekishushani ahabw’enyamaishwa egyo eyaahutaazibwe na rurara, ekanga ekagumaho.
Abantu nibaija kuramya ekishushani ky’enyamaishwa?
Okushuuruurirwa 13:15:
Yaikirizibwa kuha ekyo kishushani ky’enyamaishwa omwitsyo, ngu kigambe, kandi kiitise abantu boona abangire kukiramya
Ekiragiro kya Ruhanga nikishoboorora ki aha bishushani?
Ebiragiro 5:8-10:
Otaryekorera ekishushani kyona ekibaizire, n’obu kyakuba ekishushani ky’ekintu kyona ekiri ahaiguru omu iguru nari ekiri omu nsi ahansi, nari ekiri omu maizi okuzimu; ataribiinamira, kandi otaribiheereza; ahakuba nyowe MUKAMA Ruhanga waawe ndi Ruhanga w’eihato, ntura abaana eby’okushiisha bya baishebo abarikuunyanga okuhitsya aha b’obusingye bwa kashatu n’obwa kana; kwonka abaana b’abarikunkunda bakoorobera ebiragiro byangye, mbagirira embabazi okuhitsya obusingye enkumi n’enkumi.
Omurangi w’ebishuba naija kuruga omu nyikiriza eha?
Matayo 24:4-5:
Yesu yaabagarukamu ati: mwerinde, omuntu weena ataribahabisa; Ahabw’okuba baingi baryaija omu iziina ryangye, nibagira bati: Ninye Kristo! kandi baryahabisa baingi.
Omurangi w’ebishuba naija kwiija nk’Omwana gw’entaama?
Okushuuruurirwa 13:11:
Kandi naareeba enyamaishwa endiijo neeruga okuzimu omu itaka, eine amahembe abiri nk’ag’Omwana gw’entaama, neegamba nk’ekijoka.
Omwana gw’entaama wa Ruhanga ohikire nooha?
Yohaana 1:36:
“Yaareeba Yesu naagyenda, yaagira ati: Reeba, Omwana gw’entaama wa Ruhanga!”
Ekinyamaishwa n’omurangi w’ebishuba, kubaraije omu iziina rya Kristo, nibaija kuhenda ekiragiro kya Ruhanga kya kashatu?
Ebiragiro 5:11:
“Otarizaanisa eiziina rya MUKAMA Ruhanga waawe; ahakuba MUKAMA tarimubara nk’otaine rubanja orikuzaanisa eiziina rye.”
Omurangi w’ebishuba naija kubaiha abantu omu muringo guuha?
Okushuuruurirwa 13:13-14:
Neekora obumanyitso obukuru, nangwa n’okwiha omuriro omu iguru gukagwa aha nsi omu maisho g’abantu; ahabw’obumanyitso obwo obu yaahairwe kukorera omu maisho g’egyo nyamaishwa, yaabaihabaiha abatuura omu nsi, ngu bakore ekishushani ky’enyamaishwa egyo eyaabaire ehutaazibwe na rurara, ekanga ekagumaho.
Eiziina ry’omurangi w’ebishuba orikukora eby’okutangaaza erindi nibamweeta oha?
2 Abatesalonika 2:8-10:
Obwo, omugomi ogwo aryashuuruurwa, kandi Mukama waitu Yesu ayamwitsa orwoya rw’omu kanwa ke, amuhwerekyereze n’okumurinkana kw’ekitiinitsa ky’okwija kwe. Omugomi ogwo oriija ahabw’amaani ga Sitaani, aryaija n’obumanyitso n’eby’okutangaaza by’ebishuba, n’obugobya bwona obubi obw’okuhabya ab’okuhwerekyerera, ahabw’okuba bakanga kukunda amazima ngu bajunwe.
Manya eki: Omugomi nikimanyitsa “otarikukurarira mateeka” nari “omuhenzi w’ebiragiro.” Omugomi naija kwegyesa abantu kuhenda ebiragiro bya Ruhanga.
Yesu Kristo akagambaki aha biragiro ikumi bya Ruhanga
Matayo 5:17-19:
Mutatekateeka ngu nkaija kwihaho Ebiragiro n’eby’abarangi. Tindaizire kubiihaho kureka okubihikiiriza. Buzimazima nimbagambira nti: Eiguru n’ensi okuhitsya obu birihwaho, Ebiragiro tibiriihwaho, n’obu yaakuba enyuguta emwe nari akatonyezi kamwe okuhitsya byona obu birihikiirizibwa. Omuntu weena orihenda ekiragiro kimwe ahari ebi, n’obu kyakuba kiri kikye okukira ebindi byona, akakyegyesa abantu atyo, aryayetwa muto omu bukama bw’omu iguru; kwonka oribikwata akabyegyesa, ogwo aryayetwa mukuru omu bukama bw’omu iguru.
Matayo 19:17:
Yamugarukamu ati; nonyeteraki murungi? “Tihariho ori murungi kureka Ruhanga wenka. Ku oraabe nooyenda kutaaha omu magara agatahwaho, oyorobere ebiragiro.”
Abakuratsi ba Kristo abarahereruke, nibaija kukuratira ebiragiro?
Okushuuruurirwa 12:17:
Ekijoka nikwe kugirira ogwo mukazi (Omukazi ekirikumanyisa Ekanisa ya Ruhanga) ekiniga, kikaza kurwanisa oruzaaro rwe orutsigaireho, orurikworobera ebiragiro bya Ruhanga, rukahamya ebya Yesu;
Ruhanga naayeta ata abataine kamanyitso k’ekinyamaishwa?
Okushuuruurirwa 14:12:
“Aho niho okugumisiriza kw’abarikwera kumanyirwa, aboorobera ebiragiro bya Ruhanga, bakaikiriza Yesu.”
Manya eki: Okushuuruurirwa 14:9-11, nihashoborora ebifubiro byabo abaine akamanyitso k’ekinyamaishwa. Okushuuruurirwa 14:12, hashoboorora ahari abo abataine kamanyitso k’ekinyamaishwa. Ku oraarinde ebiragiro bya Ruhanga, torikwaija kutunga akamanyitso k’ekinyamaishwa.
Akamanyitso k’ekinyamaishwa karinkahi?
Okushuuruurirwa 13:16:
Kandi abantu boona, abato n’abakuru, abatungi n’abooro, ab’obusingye n’abahuuku, yabaragiira kuteebwa akamanyitso k’ekinyamaishwa, aha mukono gwa buryo nari aha buso.
Abantu ba Ruhanga bashemereire kugira ekibatiibwa aha buso naha ngaro zaabo?
Ebiragiro 6:6,8:
Kandi ebigambo ebi, ebi ndikukuragiira eri izooba, bishemereire kukuguma aha mutima;… Obikome aha mukono gwaawe, bibe akamanyitso, obite aha buso bwaawe ahagati y’amaisho gaawe.
Manya eki: Hanu Musa akaba namanyitsa ebiragiro ikumi, ebiyashoboraire omu kitabo ky’Ebiragiro 5. Abarikukuratira Ruhanga bashemeraire kugira ebiragiro bye aha mitima yaabo (ekirikumanyisa ebyetengo byaabo), naha buso bwabo (ekirikumanyisa ebi barikutekateka).
Mbweenu shi tugire ngu ekiragiro kya kana n’akarambe, niinga shi akamanyitso k’abaana ba Ruhanga?
Okuruga 31:13:
Kandi ogambire ab’Israeli oti: Buzimazima mutaribura kurinda Sabato zangye; ahabw’okuba niko kamanyitso ahagati yangye naimwe omu busingye bwanyu bwona, mubone kumanya ku niinye MUKAMA orikubeeza.
Ezekieli 20:12, 20, nihagira hati:
Kandi naabaha Sabato zangye kuba akamanyitso ahagati yangye nabo, ngu babone kumanya ku nyowe MUKAMA, niinye mbeeza. … Kandi mugume mweze Sabato zangye, zibe akamanyitso ahagati yangye naimwe, mubone kumanya ku nyowe MUKAMA ndi Ruhanga wanyu.
Abarahungye eby’obusaatsi nibaija kuba baine akamanyitso ka Ruhanga?
Matayo 24:20-21: Mushabe okuhunga kwanyu kutaribaho omu biro by’embeho nari ahari Sabato; ahabw’okuba omu biro ebyo haryabaho okubonabona kwingi okutakabahoga okwiha aha kuhangwa kw’ensi okuhisya hati, kandi tikuribaho bundi.
Yesu Kristo, n’abatume be bakaba barinda Sabato?
Luka 4:16: Yaataaha (Yesu) Nazareesi, ahu yaakuriire; ahari Sabato Yaataaha omu orukungaane rw’abantu, nk’omucwe gwe oku gwabaire guri, yaimuka kushoma.
Luka 4:31: Yaaashuuma (Yesu) yaaza omuri tauni ya Galilaaya erikwetwa Kaperenaumu. Ku yaabaire naabeegyesa ahari Sabato.
Luka 13:10: Ku yaabaire naayegyesa (Yesu) omu rukungaane rumwe aha izooba rya Sabato.
Luka 23:56: Baagarukayo (Abatendekwa), baateekateeka eby’emigaiju n’amajuta. Ahari Sabato baahuumura, nk’oku ekiragiro kiri.
Ebyakozirwe 13:14: Kwonka bo ku baahingwire nibaruga Peruga, baahika Antiokia ey’omuri Pisidia. Baataaha omu rukungaane aha izooba rya Sabato baashutama.
Ebyakozirwe 13:42-44: Ku baabaire nibashohora, abantu baayeshengyereza ngu ebigambo ebyo bagarukye babigambirwe ahari Sabato erikwija. Ku baaherize kushohora, Abayudaaya, baingi n’abahindukiire omu diini yaabo baakuratira Paulo na Barunaba; bo baabeehanangiriza nibabagambira kugumizamu omu mbabazi za Ruhanga. Ahari Sabato eyakurasireho, ab’omururembo haihi boona baateerana kuhurira ekigaambo kya Ruhanga.
Ebyakozirwe 16:13: Aha izooba rya Sabato twashohora twaraba omu irembo ryarwo, twaza aha rubaju rw’omugyera, ahu twateekateekire ngu hariho omwanya gw’okushabiramu; twashutama ahansi, twagamba n’abakazi abaateeraniireyo.
Ebyakozirwe 17:2: Paulo nk’omucwe gwe oku gwabaire guri, yaabatahamu yaabahakanisa omu byahandikirwe okumara amazooba ashatu ga Sabato.
Ebyakozirwe 18:4: Buri Sabato yaaguma naahakanisa Abayudaaya n’aba Guriiki omu nkungaane, nabaikiririsa.
Abaheburayo 4:9-10: N’ahabw’ekyo hakiriho Sabato y’okuhuumuriraho ebiikiirwe abantu ba Ruhanga; ahakuba omuntu weena otaahire omu buruhuukiro bwa Ruhanga, biri ahuumwire emirimo ye, nk’oku Ruhanga yaahuumwire eye.
Abatume ba Yesu, bakaba barariinzire Saande omumwanya gwa Sabato?
Ebyakozirwe 20:7, nihashoboorora aha kurya hamwe kwa Paulo n’abatendekwa ba Yesu aha kiro ekyo k’okubanza omu sabiti. Ahakurigirira oku Abaheburayo barikubara obwaire, ekiro nikitandiika eizooba ryaheza kurenga. N’ahabw’ekyo, okurya hamwe oku kukabaho orwa mukaaga omu kiro, eizooba eryakurasireho ekaba eri Saande. Paulo tarahuumwire, niinga kutaho saviitsi y’ekanisa-nangwa, akatambura kilomiita nka makumi ashatu yaaza Asoosi ahari Saande (Ebyakozirwe 20:13-14).
Omuri 1 Abakorinso 16:2 Paulo akaragiira Abakorinso kurundaana eby’okurya buri Saande kubyohereza Buyudaaya omu bwaire bw’enjara. Ab’ekanisa y’Abakorinso, bakaba babugana orwa mukaaga, butari Saande (Abakorinso 18:4).
Abantu bakaronda izooba ki, kuhuungura Sabato?
Shoma Katiisimu, 2175:
Saande eine entaaniso mpaango, ahari Sabato eyi erikukuratirwa, omukweetoroora kw’esabiiti; aha bw’abaikiriza, okugikuza nikihikiiriza omugyenzo gwa Sabato. Omu kuhiingurwaho kwa Kristo, Saande nehiikiriza omazima g’omugyenzo gw’Abayudaaya gwa Sabato, ogurikuraangirira okuhuumura kw’omuntu omuri Ruhanga. Aha bw’okuramiza ahansi y’ekiragiro, ekyatebekanisiibwe aha bigyendererwa bya Kristo, kandi n’ebyakozirwe, bworeeka amatsiko agitwaine omuri Kristo: Abo abatoriize engyenderwaho enkuru, baine amatsiko agandi, n’ahabw’ekyo tibaashemeraire kurinda Sabato, kureka ekiro kya Mukama waitu, eki amagara gaitu garikuheerwamu omugisha omukufa, n’okuzooka kwe.
Manya eki: Katiisimu teine kakwaate na Baibuli, n’enyegyesa y’abakaturiki.
Sabato ekahiindurwa ryari, kukuzibwa aha Saande?
Omuri 135 AD (Hahwaireho emyaaka nka kikumi Yesu aherize kufa) omutegyeki wa Rooma orikwetwa Haduriani, akaheenda ekiragiro ky’okurinda Sabato. Ekifubiro ky’okurinda Sabato, kukaba kuri okwiitwa. Aha nshonga egi, baingi omu baikiriza, baareka kurinda Sabato, haza Saande yaarahuka kuba orunaku, rw’okuramizaho.
Ku bwagiire kwenda omuri 155 AD, Yusitiini omujurizi, w’enyikiriza, yaahandiika ati: “Saande, nirwo runaku ruturi kweruundaniraho kuramya, ahabw’okuba n’izooba ry’okubanza, eri Ruhanga yahangiremu ensi” (Okwesaasiza kw’okubanza, eshuura ya 67).
Omuri 321, Konstantini omukungu wa Rooma, yashohoza iteeka ririkugira ngu, “Abaramuzi boona, n’abantu b’omundembo, n’abari kuragura, bashemereire kuhumura aha kiro ky’eizooba” (Ayeeri, Yozefu Kuleeni, 1913. Oburugo bw’ebyafaayo b’ekanisa ya kare.2.1.1.59&.).
Omuri 365 AD, akakiiko omuri Laodikea, Ekereziya y’abakaturiki ekataho iteeka ngu: “Abiikiriza tibaashemeraire kutoreeza Abayudaaya bakahuumura ahari Sabato, kureka bashemereire kukora aha kiro ekyo, reero bakakuza ekiro kya Mukama waitu; baaba nibabaasa bakahuumura nk’abiikiriza” (Kanooni 29).
N’obaasa kushoma ahakuhindurwa kw’orunaku rw’okuramizaho Kuruga orwa mukaaga kuza Saande, orikurabira aha mukutu ogu: Ahabwenki abiikiriza baingi, nibaramya aha izooba rya Saande.
Ekinyamaishwa nikyaija kugyezaho kuhindura obunaku n’Ebiragiro?
Danieli 7:25:
Ogwo niwe arigamba eby’okugomera Rukira-boona; kandi aryanyangaraza abarikwera ba Rukira-boona. Agire enaama y’okuhindura obunaku n’ebiragiro, kandi biryarekwa omu mikono ye, okumara omurundi, emirundi, n’ekicweka ky’omurundi.
Akamanyitso k’ekinyamaishwa nikaija kugyemwa, omurangi w’ebishuba, orikweija kweyeta mukuru w’enyikiriza?
Okushuuruurirwa 13:16:
Kandi abantu boona, abato n’abakuru, abatungi n’abooro, ab’obusingye n’abahuuku, yabaragiira kuteebwa akamanyitso aha mikono yaabo, nari aha buso;
Okuhendera
Akamanyitso k’abantu ba Ruhanga nikaahi? Akamanyitso k’ekinyamaishwa nikaahi? Baibuli n’etugambiraki? Waaba otari kumanya ansa, garuka oshome ekyegyeso eki, n’obaasa kubyetegyereza kurungi, waheza kukishoma omurundi gwa kabiri.
Ekyegyeso ekirikukurataho: Googi, Magogi, Haramagedoni