Haryabaho Okuhindirwa Kw'emiri (Rapukya) Hatakabaireho Ebiro By'obusaatsi?

Abantu baingi nibatangaara, “hoona ninyija kuba nayetererize Kristo yaaza kugaruka?”

Abandi bagira bati, “eby’emperu” tibinkwaiseho, ninyija kuba ntakiriho-ninyija kuba naahindukiire amuri “rapukya.”

Kandi shi iwe? Niiwe notekateka ngu Kristo naija kukuhindura ebiro by’obusaatsi bitakahikire?

Katureebe Baibuli neegambaki ahari rapukya

Eky’okubanza oine kukimanya ku ekigaambo rapukya kitari mu Baibuli. Kweihaho 1 Abateselonika 4:17, nihashoborora aha bwaire obu abakuratsi ba Kristo “baritwarwa” kubugana Kristo omu bicu.

Eki nikyo turishoma aha mushororongo ogu.

Kandi nimbagambira eki, tukigambiirwe Mukama waitu, ngu itwe abahuriire abarishangwa bakiriho aha kiro ky’okwaja kwa Mukama waitu, tituribandiza abo abagwejegyeire. Ahabw’okuba Mukama aryayeimukira ashuume naruga omu iguru agambe munonga n’eiraka rya maraika omukuru, n’enzamba ya Ruhanga: kandi abafeereire omuri Kristo nibo baribanza kuzooka: bwanyima naitwe abahuriire abariba bakiriho, turyatwarwa nabo omu bicu kubugana Mukama waitu: tutyo tugume nawe ebiro byoona. N’ahabw’ekyo muhumurizane n’ebigambo ebyo (1 Abateselonika 4:15-17).

Banza okyenge okubikurataine.

1. Nitutandika na Yesu Kristo arikushuuma naruga omu iguru enzamba yaaheza kuteerwa. 2 “Abafeereire omuri Kristo” babanze bazooke
2. Reero abatorainwe abahuriire batwarwe nabazookire kubugana Kristo omu bicu.

Eki nikireebeka nk’omuringo murungi gw’okuhungiramu obusaasi, kwonkashi nikikubaho ryaari?

Nitushanga obwaire bwaakyo obuhikire omuri 1 Abakorinso 15:51-52:

Reeba, nimbaatira enaama nti: twena titurigwejegyera, kwonka twena turyahindurwa, omukanya kakye, nk’ak’okubumbya eriisho aha nzamba ey’aha mperu. Ahakuba enzamba eryagamba, kandi abaafire baryazooka obutagaruka kujunda, naitwe turyahindurwa.

Hati naiwe eki nokireeba ngu nikishoborora kurungi aha kuhindurwa. Enzamba kuterwa, abaafire bakazooka, aba torainwe bakahindurwa emibiri yaabo obutajunda.

Okimanye kurungi, ngu ebi nibazakubaho aha “nzamba erikuhereruka.”

Baibuli neshoborora aha nzamba mushanju ezirikwaija kuterwa ba maraika aha kiro kya Mukama waitu (Zefania 1:14-16; Yoweri 12:1, Okushuuruurirwa 8; 9; 11:15-19). Omukyegyeso ekihwaire okareeba ku enzamba erikuhereruka eya mushanju erikwaija kuteerwa aha muheru gwe ekiro kya Mukama waitu, Omwaka gumwe twaheza kuruga omu bwaire bw’obusaatsi.

Abantu abu Ruhanga yatoraine, tibarikweja kutwarwa omu iguru omu bwaire bw’obusaatsi.

Okuzooka kw’okubanza kuryahika aha nzamba ya mushanju ey’aha muheru, hahwaireho ebiro by’obusaatsi (1 Abakorinso 15:51-52). Omu kyegyeso ky’ikumi, noija kwega ngu abaribugana Kristo omu bicu tibarisigarayo. Kuharihwaho ebiro bikye baryagaruka, omu nsi na Kristo (Okushuuruurirwa 19:14; Zakaria 14:5), Reero baryatura kandi bategyeke na Kristo omu nsi (Okushuuruurirwa 5:10; Zakaria 14:9; Danieli 7:27).

Enyegyesa erikugira ngu abiikiriza baryahindurwa batwarwe omu iguru batureyo ebiro n’ebiro, terikushangwa mu Baibuli. Rapukya n’enyegyesa y’abantu eteine kakwate n’ebi Baibuli erikwegyesa. Shooma egyo emishororongo yoona einakuhereza oyerebere amazima eki Baibuli erikugamba.

(kandi waaba otabikyengire kurungi, nakushaba shoma kandi oyetegyereze eki Yesu y’abaire namanyitsa obuyagira ati: “kubariba bari babiri omwe aryatwarwa odaijo asigare omuri Matayo 24:40”)

Mbweenushi ekyo nikimanyitsa ngu abahereza ba Kristo baraija kubonabona omu bwaire bw’obusaatsi? Ngaaha buzima! Ruhanga naija kurinda bamwe aha baikiriza kwonka kutari kubatwaara omu iguru. Baibuli netugambira ngu Ruhanga akatebekanisa omwanya gw’obucureera aharishereka abahereza be omu bwaire bw’obusaatsi. Aryabashereka omumwanya gw’obucureera hatari omu iguru.

Yecumintirize eki Kristo yaagambaire abatendekwa be omuri Matayo 24:15-21:

“Kandi ku murireeba ekirikuzira ekirikuhwerekyereza, ekyagambirwe omuri Danieli omurangi, kyemeraire omu mwanya ogurikwer”a, (orikushoma ayetegyereze) abo abari Buyudaaya omu bunaku obwo bahungire aha nshozi; n’ori aha mutwe gw’enju ataritemburika ngu agire ebi aiha omu nju ye; n’oriba ari omu misiri atarigarukayo kwenda ekijwaro kye. Abariba baine enda n’abarikwontsya omu biro ebyo baryakareeba! Mushabe okuhunga kwanyu kutaribaho omubiro b’embeho nari ahari Sabato; ahabw’okuba omu biro ebyo haryabaho okubonabona kwingi okutakabahoga okwiha aha kuhangwa kw’ensi okuhisya hati. Kandi tikuribaho bundi.

N’amazima hariho omuringo gw’okweshereka, kwonka abarayeshereke tibarikweija kurinda kutwarwa omu iguru, baine kutsigaho amaka gaabo na burikimwe bakahungira, omu myanya eyi Ruhanga arabarindiremu.

Abararindwe obusaatsi obu nibaahi?

Shooma aha kuraganisa okuri omu Kushuuruurirwa 3:10;

“Iwe okarinda ekigaambo kyangye nanye nikyo ndikurindira omu bunaku bw’okugyezibwa oburaija omu nsi yoona, okugyeza boona abagituuramu. Kwonka origumitsiriza akahika aha muheru, niwe ari juwa.”

Abakuratsi ba Kristo abarigumitsiriza kuhitsya aha muheru, baryahungira omu myanya y’obutebekana eby’obusaatsi bwaingi bitakatandikire.

“Okugumisiriza kuhitsya aha muheru” nikimanyitsa ki?

Yesu ku arabambure akamanyitso k’okubanza, enyegyesa etahikire neza kuza aha butegyeki (Okushuuruurirwa 6:1,2; Matayo 24:4,5). Enyikiriza etahikire neza kuhiganisa enyikiriza ey’amazima (Matayo 24:5-12).

Ruhanga naza kukoresa obwaire bw’okuhiganitsibwa obu kugyezesa abahereza be.

• Baingi nibaija kukuratira enyegyesa etahikire eraabe eine obushoborozi kandi erikukuratirwa baingi.
• Abandi nibeija kurinda enyikiriza yaabo ahabw’okwetantara oku higanitsibwa. **
• Reero abandi nibaza kwemerera bataine kutiina baburire engiri omu nsi yoona kwonka barikuhiganisibwa (Matayo 24:14).

Ruhanga naija kurinda baahi? Abarri kwaitwa nshoni ahabw’okwikiriza kwabo bakagumisiriza omu kuburira engiri kuhitsya aha muheru nibo barijunwa (Matayo 24:13,14). bahikire ekigyezo baahayo okwikiriza kwaabo.

Banza oreebe eki Yesu yaagambire omuri Mariko 8:35,38:

Ahabw’okuba omuntu weena orikwenda kukiza amagara ge aryagabuza; kandi weena orikubuza amagara ge ahabwangye n’aha bw’engiri, aragakiza…mumanye ngu omuntu weena orikweitwa enshoni ahabwangye n’aha bw’ebigambo byangye omu busingye obu obw’obushambani haza obubi, omwana w’omuntu nawe aryaitwa enshoni aha bwe, ku ariizira omu kitinitsa kya ishe na baamaraika abarikweera.

Tushemeraire kwehayo kufeerwa amagara gaitu ahabwa Kristo n’engiri. Kuturayoreke Kristo ngu okumukuratira nikikira okurinda amagara gaitu, naija kuturinda obutahikwaho akabi.

Abarisingwa ekigyezo eki eby’obusaatsi bitakatandikire-abarikwanga kuburira engiri ngu batahiganitsibwa baryahikwaho okugyezibwa omu bwaire bw’obusaatsi.

Nitushanga enyikiriza z’emiringo ebiri eziri omukitabo ky’Okushuuruurirwa n’ekitabo kya Danieli.

Omu kushuuruurirwa eshuura ya kabiri n’eya kashatu, harimu ebaruha ezahandiikiirwe ekanisa mushanju. Ezi baruha zikaba ziri ebaruha z’okuhanuura zirikushoborora aha butwaare mushanju oburahike aha makanisa ga Ruhanga kumara amagana g’emyaaka. Eky’okureberaho, Okushuuruurirwa 2:10 nihagira ngu ekanisa ey’omuri Sumuruna, “eryahikwaho okugyezibwa kw’emyaka ikumi,” eki kikaba nikihanuura aha kuharahazibwa kw’ekanisa ya Ruhanga erikuhiganitsibwa aba Rooma okw’amazire emyaka ikumi 303 AD-313 AD.

Obutware bw’ekanisa oburi kushembayo bubiri, n’obwa Filadelufia na Laodikea.

Abiikiriza omuri Filadelufia nibakuratira ebiragiro bya Mukama, tibarikumwehakana, kandi nibakuratira omuhanda ogu Kristo arikuboreka kwegyesezamu engiri (Okushuuruurirwa 3:8; gyeragyeranisa na 2 Abakorinso 2:12). Aba nibo biikiriza abaraganisibwe okurindwa omu bwaire bw’obusaatsi (Okushuuruurirwa 3:10; Danieli 12:12).

Abiikiriza aba Laodikea baine amaryo, nibabuzabuza, nibeikiririzamu kandi n’empumi omu by’enyikiriza (Okushuuruurirwa 3:14-17). Laodikea nejwekyera ekishushani eki ekanisa nyingi ziriba zirimu aha mperu. Yesu akagira ngu naija kubatanaka abagyezese omuriro (Okushuuruurirwa 3:16-18; Danieli 12:10). Ahabwenki arikwaija kubagyezesa omuriro? “Boona abu nkunda mbateitsa kandi mbahana; n’aha bw’ekyo oyezirikye, oyeteitse” (Okushuuruurirwa 3:19).

Yesu Kristo naija kureka bamwe aha buhereza be bahikweho eby’obusaatsi bweingi ahabw’oburungi bwabo. Nabashaba kuba ab’obujunanizibwa, bakaihaho omwehuriro n’okwetwaramu nk’abari kushwara aha bwe, kugira ngu abahe amagara gatahwaho yaaheza kugaruka. Abahereza aba, nibaija kuba abajurizi abariba nibaheeeza obuhame bwa Ruhanga omubwaire bw’obusaatsi bwaingi (Okushuuruurirwa 6:9-12).

Omukazi w’Okushuuruurirwa 12

Nitureeba guruupu ibiri z’enyikiriza-erikubanza n’erikuhungira omumwanya gw’obucureera, endaijo n’erikusigara etahungire: byona nibigambwaho omu Kushuuruurirwa 12.

Okushuuruurirwa 12, nikushoborora ahari eki; “Omukazi ajwaire eizooba, n’okwezi kuri ahansi y’ebigyere bye, n’aha mutwe gwe hariho ekirunga ky’enyonyozi ikumi na ibiri” (Okushuuruurirwa 12:1). Omukazi ogu namanyitsa abatorinwe ba Ruhanga Israeli (shoma Okutandika 37:9), omukazi akazaara omwana, Kristo owaazairwe omu ruganda rwa Yuda.

Kuturikuruga aha kuzaarwa kwa Yesu, okuhanuura oku kuhinduka kuza aha kanisa ya Ruhanga. Baibuli neshoborora ku Ekanisa ku erikubarwa nk’omukazi omu maisho ga Ruhanga (Aba Feeso 5:22-23) kandi nibagyeeta “Israeli wa Ruhanga” (Aba Garatiya 6:16). Ihanga rya Israeli nikwo kuhanuura kw’ekanisa, ab’Israeli nirwo ruzaaro rwa Abrahamu omu buzaarwa, reero ekanisa n’abaana ba Abrahamu omu kwiikiriza.

Kristo kuyaagiire omu iguru, omukazi yahungira omu ihamba kumara ebiro rukumi na magana abiri na makumi mukaga (1260) (Okushuuruurirwa 12:6). Eki nikitushoborora obwaire bw’emyaaka 1260, obu abakuratsi ba Kristo (ekanisa ya Ruhanga) baaza omumyanya ya buraijo barikuhunga okuhiganisibwa.

Eki kikabaho ryari?

Baibuli neetugambira ngu kuhahwaireho akaire Kristo azookyire, abegyesa b’ebishuba batandika kutahirira ekanisa ya Ruhanga (Ebyakozirwe :20:29-30; 2 Abakorinso 4:13-15; 2 Petero 2:1). Abeegyesa aba bakegyesa Kristo otahikire n’engiri etari y’amazima (Aba Garatiya 1:6-9, 2 Abakorinso 11:4). Reero ababaire nibeyetamu abiikiriza, batandika kwebaganisamu.

Kuwakuza kukuratiriza empandika “y’ekanisa enkuru” kugigyeragyeranisamu n’entsya eriho hati, noija kukireeba ngu abamwe bakongyeramu enyegyesa “endeijo omukwiikiriza,” haza bayetantara byeingi eby’enyegyesa ya Kristo n’abahereza be. Kuhagiire kuhwaho obwaire, abaakurateire enyegyesa ey’emishororongo ehikire batandika kugaywa abarikweyeta abiikiriza kandi bari abiikiriza b’ebishobobo. Aga nigo mazima agahikire omu byafaayo.

Konstantini kuyabaire omukungu wa Rooma, yaahamya ab’enyikiriza ya Kristo kuba nibo bajanjaza enyikiriza yaabo omu butegyeki bwe. Konstantini ogu akaba atashemerereirwe okwebaganisamu kwabo ababaire nibeyeta abiikiriza. N’ahabwekyo omuri 325 AD, akataho akakyiko omuri Nikayea kugira ngu aiheho okuterebushukana okwabaire kuri omu micwe n’emitwarize. Enshonga y’amaani eyaaretsire orukiiko oru, kukaba kuri okucebera yaaba Ruhanga ariho nari kuri okubuzabuza, hamwe na n’okureebuza yaaba abiikiriza bashemereire kujaguza ekiro ky’okuhingurwaho aha kiro kya ikumi na bina barikukuratira kalenda y’Abaheburaayo, nk’oku abayudaaya babaire nibatwaza ningashi yaaba bashemereire kurinda Easter Sande. Akakiiko ako kakagarikamu ebibuuzo ebi kandi kashohoza enyegyesa ey’abakaturiki omu iramizo rya Rooma. Ab’enyikiriza ezindi babatwaramu kuba abatahikireire.

Konstantini ogu, akareetera enyikiriza y’abakaturiki kuba niyo yaaba enyikiriza erikwiikirizibwa omu butegyeki bwe. Aho ekanisa ya Rooma yaatunga obuhagizi bwa abaserukare ba gavumenti, batandika kuhiganisa ababaire nibahakanisa enyikiriza yaabo, Abayudaaya, n’abandi abahakaneitse ensharamu yakakiiko ako. Ahabw’okuba abantu bakaba batarikwiikirizibwa kuhakanisa enyikiriza erikushagikwa gavumenti. Aho abantu batandika kuzibirwa kugira Baibuli nokugishoma ahabwabo nk’abantu!

Ekitambo ky’okubanza kuteerwa kuha amadiini obugabe kikateerwa omuri 1576, obu ab’omumatemba ga Holandi baata omukono aha kihandiiko ky’okweterana kwa Uritureki (Union of Utrecht). Omuri egi ndagaano, bakikiirizana kukwatanisiza hamwe bakarwanisa obutegyeki bwa Supeyini, kandi kushagika enyikiriza ya buri muntu. Omuri 1581, abateraine aba bakatunga okwetegyeka kuriga ahari Supeyini, okugwa kwa Antiwepu omuri 1585, ekaba entandikiriro y’okurwanirira obugabe bw’amadiini. Eky’okutangarira, aba Supaana ababaire batarikwiikiriza bugabe bw’amadiini, bakwata Antiwepu bagihereza Abakurisitaayo emyaaka ena batakarigireyo.

Omuri 1598, ekihandiiko kya Nantetsi kyaikiriza obugabe bw’amadiini omuri Furansa. Obugabe bw’amadiini omuri Amerika bukatandika 1636, kutandikira aha kirwa kya Roda. Ekihandiiko ky’okwiikiriza ediini omuri Bungyereza kikashohozibwa omuri 1689.

Kuriga omuri 1585, hatuura hariho omwanya ogu abantu barikushomeraho Baibuli, bakakuratira eki erikugamba hataine orikubahiganisa. Omukazi w’omu Okushuuruurirwa 12 akaba atakyaine kutorokyera omu ihamba arikuhunga okuhiganisibwa.

Ekanisa aha muheru gw’egi myaaka neija kuba eri eta?

Obugabe bw’amadiini oburiho omumyanya myeingi nibuza kugaruka bweihweho.

Omu Kushuuruurirwa 12:7-12, nihashoborora oku ekijoka na baamaraika baakyo baraije kugyezaho kurwanitsa Ruhanga. Nibyaija kutsingurwa omurutaro bishuume omu nsi akaire kakye emperu etakahikire (Omushororongo gwa 12). Eki kukiraabeho, nihaija kubaho empindahinduka y’amaani omu nsi, ekijoka na baamaraika baakyo nibaija kukoresa eby’obutegyeki, ediini, n’amahe kurwanitsa abaana ba Abrahamu omu buzaarwa hamwe n’enyikiriza.obugabe bw’enyikiriza nibwaija kwihwaho oshange okuburira engiri kutakiriho (Matayo 24:14; Amos 8:11-12).

Obaire wayegire ku bamwe aha bakuratsi ba Kristo barahungire omu nshozi ebiro makumi na bishatu eby’obusaatsi bwaingi bitakatandikire (Matayo 24:15-20; Danieli 12:11). Reero nihakukuratahoki?

Okushuuruurirwa 12:14-16:

Kwonka omukazi yaahebwa amapapa abiri g’eishamba rihango, ngu aguruke ahungire ekyo kijoka omu ihamba kumara omurundi emirundi, n’ekicweka ky’omurundi. Ekijoka cyacwera amaizi garikwiingana omwegyemure enyima y’ogwo mukazi ngu gamutware. Kwonka ensi yahwera omukazi ogwo, yayashama yamira omwegyemure, gu ekijoka cyacwaire.

Okuhanuura oku nikukoresa obumanyitso oburikushobororwa omu bicweka bya Baibuli ebindi.

• “Amapapa g’eishamba rihango” nigamanyisa obuhwezi n’oburinzi ebi Ruhanga arihereza abahereza be omukuhunga eby’obusaatsi (Okuruga 19:4).
• “Ekijoka” nikimanyitsa Sitaane (Okushuuruurirwa 20:2).
• “Omugyera” nikimanyitsa amahe (Yeremia 46:7-9).

Bamwe aha bakuratsi ba Kristo baraija kutoroka bahuungire omu myanya etarikutuurwamu ahu baririndirwa kandi bakariisibwa kumara emyaaka eshatu n’ekicweka. Kwonka abiikiriza aba omuri Laodikea abaine omwehuriro n’amaryo, (Okushuuruurirwa 3:16-19), tibarihungira mu myanya egyo. Sitaani naija kuhiganisa abiikiriza abarasigare batahungire omu bwaire bw’obusaatsi n’ekiro kya Mukama waitu.

“Ekijoka nikwe kugirira ogwo mukazi ekiniga kikaza kurwanitsa oruzaaro rwe orwatsigaireho, orurikworobera ebiragiro bya Ruhanga, rukahamya ebya Yesu” (Okushuuruurirwa 12:17).

Bamwe aha b’ekanisa ya Ruhanga nibaija kuhikwaho eby’obusaatsi ahabw’enda kubaboneza n’okubaterereza okuzooka kw’okubanza (Danieli 12:10; Okushuuruurirwa 3:18).

Eky’okwebuuzaho

Tugire ngu hariho amatsiko gaabo abarayeshange omu by’obusaatsi?

Ningashi ku orayeshange omu bw’obusaatsi oshemaire kukoraki?

Ekibuuzo ky’okubanza, obanze oyebuuze ahabwenki Ruhanga arikweija kufubira Israeli omu bwaire bw’obusaatsi. Ruhanga akatorana Israeli kuba eky’okureberaho ah’amahanga agandi, nahabwekyo Ruhanga aine entekateka kuretera Israeli okwetaitsa omu bwaire bw’obusaatsi, kugira ngu babe eky’okureberaho kandi entsibuko y’enkwatanitsa y’amahanga goona-Kristo yaaheza kugaruka.

Shoma kandi oyetegyereze eki Ruhanga yaagambire omu Okuruga 19:5,6:

Nahabwekyo kumurihurira eiraka ryangye, mwarinda endagaano yangye, muryaaba abantu bangye ahabwangye abatorinwe omu mahanga goona: ahakuba ensi yoona n’eyangye; kandi muryambeera obukama bw’abanyamurwa n’eihanga eririkwera. Obwaire obu amahanga g’ab’Israeli nigo geebembaire obugomi n’okwanga kukuratira Ruhanga, nahabwekyo Ruhanga naija kufubira Israeli arikurabura amahanga agandi reero ab’Israeli beteisize Mukama.

Banza oshome Ezekiel 18:30-31 ohetegyereze:

“Nahabwekyo imwe ab’enju ya Israeli nikyo ndibacwerera orubanja buri muntu nk’oku emitwarize ye eri; nikwo Mukama Ruhanga arikugira. Mweteise muhindukye murekye eby’okushaisha byanyu byona, okutahikirira kurekye kubacwekyereza. Munagye hare eby’okushaisha byanyu byona ebi mwancumireho, mwetungire omutima mutsya n’omwitsyo musya! Mbwenu nimwenderaki kufa imwe nju ya Israeli mwe? Ahabw’okuba tinshemerererwa kufa kw’omuntu weena; nahabwekyo muhindukye mubone kugumaho, nikwo Mukama Ruhanga arikugira.

Ruhanga tarikwenda bantu be kufa, kureka okwetaitsa! Kandi Israeli naija kweteitsa ahabw’okuba kikagambwaho omuri Ebiragiro 4:27-31.

Ebiragiro 4:27-31;

Mukama aryabataataanitsa abanagye, omu bany’amahanga, mutsigare muri bakye omu mahanga agu Mukama aribatwaramu. Okwo muryaheererezayo ba ruhanga abakozirwe emikono y’abantu omu biti n’omumabaare, abatarikureeba, abatarikuhurira nari okurya n’obukwakuba okukaga. Kwonka okwo kumurisherurirayo Mukama Ruhanga wanyu, muryamureeba, kumurimusherura n’omutima gwanyu gwoona n’amagara gaanyu goona. Ku origira obusaatsi, ebyo byona byakuhikaho, omu biro bya bwanyima oragarukira Mukama Ruhanga waawe, oyorobere eiraka rye. Ahabw’okuba Mukama Ruhanga waawe ni Ruhanga orikusaatsira; tarikuhemukaho kandi tarikucwekyereza, n’obu kwakuba okwebwa endagaano eyi yaaragaine na baashwenkuru baawe narahira.

Omu bwaire bw’obusaatsi ab’Israeli 144,000, nibaija kweteitsa bahebwe akamanyitso k’okubarinda ekiro kya Mukama waitu kitakahikire (Okushuuruurirwa 7:1-8). Haraija kubaho “omutwe muhango gw’abantu ogu omuntu weena atarikubaasa kubara, abarugire omu mahanga goona n’enganda zoona,” abaraija kweteitsa omu bwaire bw’obusaatsi (Okushuuruurirwa 7:9-14).

Ku orayeshange omu bwaire bw’obusaatsi, sherura Ruhanga kandi omukuratire n’omutima gumwe!

“Imwe abacureezi b’omu nsi mwena abakora ebi Mukama aragiira, nimumusherure: kandi musherure okuhikirira n’obucureezi: obundi mukasherekwa aha Izooba ry’ekiniga kya Mukama (Zefania 2:3).

Omu by’orakore byona atakaikiriza akamanyitso k’ekinyamaishwa, ku oraabe waakatungire okeyiheho, oyetekeho aka Ruhanga obwaire butakakusigire. Omukyegyeso ekirikweija ninyija kukwereka emishororongo erikushoborora akamanyitso k’ekinyamaishwa n’oku orikubaasa kukeerinda.

Ekyegyeso ekirikukurataho: Akamanyitso k’ekinyamaishwa nikaahi?