Runyankore

Enkurataine Y'ebiribaho Aha Mperu

Baingi baine enyikiriza ngu ekitabo ky’Okushuuruurirwa nikibuzabuza, n’ahabwekyo tikirikwetegyerezibwa ebihandikirwemu. Kwonka banza omanye ebi ekitabo eki kirikwegambaho omuri Okushuuruurirwa 1:1-3:

Ebyashuururirwe Yesu Kristo, ebi Ruhanga yaamuhaire kworeka abahereza be ebyabaire nibyenda kubaho juba, nawe akatuma maraika we kubimanyisa omuhereza we Yohaana, owahamize ebi yaarebire byona eby’ekigambo kya Ruhanga n’eby’okuhamya oku Yesu Kristo yaahamize. Orikushoma eby’okuhanuura ebi aine omugisha, kandi baine omugisha abarikubihurira, bakata omutima aha bihandiikirwemu; ahabw’okuba obunaku bwaabyo buri haihi.

Omukitabo ky’Okushuuruurirwa, Yesu Kristo akashuuruurira abahereza be ebya ny’entsya. Waaba ori omuhereza wa Kristo, oshemeraire kwetegyereza ebihandikire omukitabo eki! Oshemaire kuta omutima aha biwayega reero Kristo akakuha omugisha. N’ahabwekyo omukyegyeso eki, oyigure Baibuli yaawe, oreebe omukitabo ky’Okushuuruurirwa, reero oyetegyereze ebi Yesu yaayorekire abahereza be.

Okurabura

Yeteeke omukishushani ngu ori omutsigyi w’erangyi, oyemeraire omumaisho g’ekitsika ky’emperu. Waatsigyire bimwe aha birikwaija kubaho nkoku orikubyetegyereza. Kwonka hakiriho obunyagarara aha kitsika kyaawe obu otakasigyire. Egyo n’emyanya eyi otarikwetegyereza.

Waaba noshoma ekyegyeso eki, noija kwetenga kuhamitsiriza aha kutsiga kwaawe. Bimwe aha bworayege, nibiza kutsimuura obunyagarara obwaba butsigaire ahakitsika kyaawe. Kwonka ebindi ebyorayege tibiratunge myanya ahakitsika kyaawe, n’ahabwekyo obireke. Ku oraheze noija kutunga ekishushani kirungi, kwonka tibirikwaija kushushana n’eby’omuri Baibuli.

N’ahabwekyo ekitsika kyaawe okireke kyonka, otagira ekiwahinduraho. Ronda orupapura rutsya, rurikweera hataine kihandikireho. Oyetwaremu nk’otaine ky’orikumanya aha by’emperu, haza okuratire ekyegyeso eki reero noija kutunga ebishushani b’ibiri. Ekishushani ky’okubanza n’ekindakworeke, ekyakabiri n’eky’otuura oine. Waheza kugira ebishushani b’ibiri ebi, kwata Baibuli yaawe ogishome, oreebe ekishushani ekyaine akakwate n’ebi Baibuli erikuhamya.

Ebiraija kubaho okubikurataine

Ninyija kubanza naakuhereza okubikurataine omukitabo ky’Okushuuruurirwa, Matayo 24, hamwe n’ebitabo by’omuri Danieli eby’okuhereruka. Naaheza ekyo, ninyija kukuhereza emishororongo erikuhamya ebinakugambira.

Ekitabo ky’Okushuuruurirwa nikitandika n’eshuura y’okubanza, erikushoborora ah’amakuru g’ekitabo eki. Eshuura yaakabiri n’eyaakashatu nitushangamu ebyafaayo by’ekanisa ya Ruhanga okuhitsya aha mperu. Omushuura yaakana, Yohaana naashoborora aha kitebe kya Ruhanga ekiri omw’eiguru, eshuura yaakataano, Ruhanga akahereza Yesu ekihandiiko ekikuranga ebiraija kubaho aha mperu y’egi myaaka. Eshuura yaamukaga neetwereka Yesu arikutandika kubambura obumanyitso oburi ahakihandiiko eki Ruhanga yaamuhaire. Eshuura ezasigara omukitabo eki, nikishoborora ahakukuratana kw’ebiribaho, kwonka zimwe ahashuura ezi, nizigurika okubikurataine zishoborora akacweka k’ebiraija kubaho.

Yesu ku arikubambura akamanyitso, burikintu ekikahandikirweho, kihikirira. Kwonka kwarabambure akamanyitso ka mushanju, nihaija kuteerwa enzamba mushanju. Enzamba mushanju zaaheza kuteerwa, ebyoterero mushanju (ebihikirizi mushanju), nibyaija kushukwa omunsi. Reero aha muheru, Yesu Kristo ayombeke obukama bwa Ruhanga omunsi, amagara n’obusingye abyeijuze omubantu be.

Oku nikwe Baibuli erikukuratanisa ebiribaho

Abavugi bana b’embaraasi/Entandikiriro y’obusaatsi n’okubonabona.

  • Akamanyitso k’okubanza: okukanya kw’enyikiriza etahikire (Okushuuruurirwa 6:1,2; Matayo 24:5). * Akamanyisto kakabiri: entaro (Okushuuruurirwa 6:3,4; Matayo 24:6,7).
  • Akamanyisto ka kashatu: enjara (Okushuuruurirwa 6:5,6; Matayo 24:7).
  • Akamanyisto ka kana: rufu (Okushuuruurirwa 6:7,8; Matayo 24:7).

Obumanyitso obu kuburatandike kukomoroka, abakuratsi ba Krito nibaija kuhiganitsibwa, abamwe barekeho enyikiriza yaabo, abandi bareebye bataahi baabo n’abanyabuzaare baabo (Luka 21:12-25; Matayo 24:9-12). Abahereza ba Kristo kubaraheze kuburira engiri kwetorora ensi yoona, “emperu neeza kuhika” (Matayo 24:13-14).

Emperu

  • Akamanyisto ka kataano

  • Orutaro rw’omwiguru, sitaani n’emizimu nibikushohorokayo (Okushuuruurirwa 12:7-12).

  • Okweyongyera kuharahaza abahereza ba Kristo (Okushuuruurirwa 6:9-12; 12:11,13).

  • Abahereza ba Kristo okwemerezibwa kuburira engiri (Amos 8:12).

  • Ebiro makumi ana nabitaano

  • omugabe w’omumashuuma naza kutahirira omugabe w’omumatemba “aha mperu” (Danieli 11:40).

  • Omugabe w’omumatemba atahirire ab’omumatemba ga Afrika na Midro Isiiti (Danieli 11:40-43). * Yeruzalemu okwetororwa abaserukare b’omumatemba (Danieli 11:41; Luka 21:20).

  • Akaire k’ebiro makumi ashatu

  • Ekirikuzira ekirikuhwerekyereza kwemerera omumwanya gurikweera (Matayo 24:15).

  • Bamwe aha bahereza ba Kristo, kuhungira omunshozi (Matayo 24:16-20; Okushuuruurirwa 3:10; 12:14).

  • Okuteera entsibo kw’amahanga g’ab’Israeli omu byentunguuka omukwezi kumwe (Hosea 5:5,7).

  • Omugabe w’omumatemba kucwekyereza baingi n’okubamariraho kimwe (Danieli 11:44; Abaleevi 26:25-26).

  • Obunaku bw’emyaaka 31/2 (Danieli 12:7; Okushuuruurirwa 11:2,3; 12:14; 13:15).

    • Eby’obusaatsi bweingi (Matayo 24:21; Danieli 12:1; Yeremiya 30:4-7).

    • B’ibiri byakashatu by’ab’Israeli kufa, reero kimwe kyakashatu kyaabo bakatwarwa omubuzaahe (Ezekieli 5; Abaleevi 26:27-39).

    • Bamwe ahabany’amahanga kwetaisa (Okushuuruurirwa 7:13,14).

  • Ebiribaho eby’obusaatsi bwaingi byaheza kuhwaho

    • Akamanyisto ka mukaga kabamburwe: Harebeke obumanyitso kuriga omw’iguru (Matayo 24:20; Okushuuruurirwa 6:12-17).
    • Ab’Israeli 144,000 baheebwe akamanyisto k’okubarinda (Okushuuruurirwa 7:3-8).

  • Akamanyisto ka mushanju kurabamburwe:** Ebihikirizi mushanju by’enzamba bitandike.

    • Enzamba y’okubanza: kimwe kyakashatu ky’ebinyantsi n’emiti byokibwe (Okushuuruurirwa 8:7).
    • Enzamba yaakabiri: Kimwe kyakashatu k’enyanja ehinduke orwamba (Okushuuruurirwa 8:8,9).
    • Enzamba yaakashatu: kimwe kyakashatu ky’amaizi gasharaire (Okushuuruurirwa 8:10,11).
    • Enzamba yaakana: Kimwe kyakashatu ky’omu bicu kishwekwe omwirima (Okushuuruurirwa 8:12,13).
    • Enzamba yaakataano: Abantu babonabonesibwe amezi ataano (Okushuuruurirwa 9:1-12).
    • Enzamba yaamukaga: Miliyooni z’amagana g’abaserukare beite kimwe kyakashatu by’abari omunsi (Okushuuruurirwa 9:13-21, n’ebihandiiko by’aba Guriiki ebyeingi). *Enzamba yaamushanju: Kristo ahinduke omugabe w’ensi (Okushuuruurirwa 11:15).

Hati oyijukye ngu omugasho gwaawe n’okukyebera yaaba ebiwashoma birikushushana n’eby’omuri Baibuli naingashi bitarikushushana nabyo.

Ekitabo kya Danieli nikihereza embaririra y’obwaire

Abantu baingi barikutekateka ngu obwaire bw’eby’obusaasi, nibwaija kumara emyaaka mushanju. Okutebereza oku nibakwaiha omuri Danieli 9:27 aharikugira hati:

Ogwo mutegyeki aryaragaana na baingi endagaano ehamire, emare saabiti emwe. Omukicweka ky’okubanza ky’egyo Saabiti aryazibira abantu kutamba ebitambo n’okuhonga empongano. Bwanyima omuhwerekyezi araizira aha ipapa ry’ebirikuzira, okuhitsya obu omuheru gwe ogwaragiirwe gurimuhikaho.

Omushororongo nigutugambira ngu haine orikwaija kuragaana na baingi endagaano y’okumara Saabiti emwe (ebiro mushanju ekirikumanyisa emyaaka mushanju). Baingi nibatekateka ngu egi ndagaano neija kuba entandikiro y’eby’obusaatsi, kwonka eki tikyo Baibuli erikushoborora.

Yetegyereze kurungi kugira ngu ebitambo nibyaija kuzibirwa ahagati y’emyaaka mushanju, bwanyima y’ekirikuzira ekirikuhwerekyereza kyaheza kuteebwa omumwanya ogurikweera. Hati Shoma eki Yesu yaagambire omuri Matayo 24:15-21:

” Kumurireeba ekirikuzira ekirikuhwerekyereza, ekyagambirwe omuri Danieli Omurangi kyemeraire omumwanya ogurikweera” (hashome kurungi), “obwo abariba bari omuri Buyudaaya bahungire omunshozi… ahabw’okuba haryabaho eby’obusaatsi bwaingi ebitakabahoga ensi kwaiha ebaho.”

Ebi Yesu yaagambire nibishoboroka kurungi, eby’obusaatsi bwaingi tibirikwaija kubaho, okuhisya obu ekirikuzira ekirikuhwerekyereza kyaheza kuteebwa omumwanya ogurikweera ahagati y’emyaaka mushanju. Ruhanga akahereza Danieli entebereza nungi y’obwaire ah’eby’emperu biritandikira. Banza oyeetegyereze kurungi oku Danieli arikubishoborora

  1. “Omubwaire bw’emperu,” omugabe w’omumashuuma naija kutahirira ow’omumatemba (Danieli 11:40).
  2. Omugabe w’omumatemba atahirire omwanya “ogurikweera” (Israeli/palasitiini) (Danieli 11:40,45).
  3. “Ku orareebe abaserukare betoraire Yeruzalemu, omanye ngu ekirikuzira ekirikuhwerekyereza kirihaihi” (Luka 21:20).
  4. Ekirikuzira ekirikuhwerekyereza nikyaija kuza omumwanya ogurikweera ahagati y’emyaaka mushanju (Danieli 9:27; Matayo 24:15)
  5. Eby’obusaatsi bwaingi bitandike (Danieli 12:1, Matayo 24:21)
  6. Abafiire bazooke Kristo yaaheza kugaruka (Danieli 12:2; Matayo 24:31; 1 Abatesalonika 4:16).

Danieli ku yaaherize kuhikwaho okwereka oku akabuuza ati; “Eby’okutangaza ebi nibyaija kumara obwaire burikwinganaki? (Danieli 12:6).

Maraika yamugarukamu ati; “nibyaija kutwaara omurundi, emirundi, nekicweeka ky’omurundi; kandi ngu ihanga eririkwera kuririteera entsibo, ebi byona birahikirira” (Danieli 12:7).

Obwaire obu nibwaija kucwiibwa bugufu kuriga ahantandikiro y’eby’obusaatsi bwaingi, kuhika aha kuzooka kw’okubanza. Nikyaija kutwarwa “omurundi, emirundi n’ekicweka ky’omurundi.” Ekitabo ky’Okushuuruurirwa nikitwereka ngu emirundi 31/2, neingana ebiro 1260 (Okushuuruurirwa 11:3; 12:14).

Maraika akahereza endaijo ntebereza y’obweire omuri (Danieli 12:11-12).

Okwaiha obu ekitambo ky’okwotsya kya burirunaku kiryemerezibwa, ekirikuzira ekirikuhwerekyereza kikateebwa omumwanya ogurikweera, haryahinguraho ebiro rukumi na magana abiri na makumi mwenda. Oritegyereza akahika aha kiro kya rukumi na magana ashatu na makumi ashatu na bitaano, aryaaba ahiriirwe.”

Omushororongo ogurikukurataho nigushoborora obunaku bushatu obu, obuburihwayo.

“Kwonka yegyendere, okuhitsya aha muheru: bwanyima oryahumura, oyemerere omumwanya ogwakutereirweho aha muheru gw’ebyo biro” (Danieli 12:13). Obunaku bushatu obu nibweija kuhwayo Danieli yaheza kuzooka aha kuzooka kw’okubanza Kristo yaheza kugaruka.

Danieli 12:11 nihagira ngu ebitambo nibyaija kwemerezibwa, reero ekirikuzira ekirikuhwerekyereza kiteebwe omumwanya ogurikweera ebiro 1290 enyima y’okuzooka kw’okubanza.

Mbweenushi enyima y’ebiro 1335 okuzooka kw’okubanza kutakabaireho nahakubayoki? Danieli 12:12 nihatugambira ngu “kan’omuhairwa origumisiriza kuhika aha muheru gw’ebiro 1335.”

Wagyeragyeranisa Matayo 24:13: “weena origumisiriza kuhika aha muheru aryacungurwa.” Ekigaambo “okugumisiriza” eky’omuri Matayo n’eky’omuri Danieli nibimanyitsa ekintu kimwe. Ebiro 1335 enyima y’okuzooka kw’okubanza nibwo “emperu” eratandike. Nibwe okuburira engiri kurahendere, akamanyisto ka kataano kakabamburwa, omugabe w’omumashuuma akatahirira ow’omumatemba.

Omubugufu

  • “Emperu” eratandika ebiro 1335, enyima y’okuzooka kw’okubanza
  • Ebitambo bwemerezibwe ekirikuzira ekitarikwikirizibwa kimerere omumwanya ogurikweera ebiro 1290 enyima y’okuzooka kw’okubanza.
  • Eby’obusaatsi bwaingi bitandike ebiro 1260 enyima y’okuzooka kw’okubanza.

Obwaire bw’obusaatsi nibuuha?.

Abantu baingi tibarikumanya ku obwaire bw’obusaatsi bwaine entanitso n’ekiro kya Mukama waitu, haza yo Baibuli neetugambira ngu n’obunaku bw’emiringo ebiri bitarikushushana.

Obwaire bw’obusaatsi tiburi bwaire bw’okubonabona bw’ensi yoona, kureka n’obwaire bw’okubonabona aha bwa Israeli na Yuda. Oku nikwo Yesu arikushoborora aha bunaku obw’obusaatsi omuri Luka 21:23-24; “Haryabaho obusaatsi bwaingi, abantu baraitwa rurara abandi batwarwe omubuzaahe omumahanga agandi.”

Yeetegyereze ekihandikirwe omuri Yeremia 30:7: “ekiro ekyo kanikitinisa munonga, kugira ngu tihakabahoga ekiro nkakyo. Neekiro kya Yakobo ky’obusaatsi kwonka naija kukirigamu.”

Hanu ekiro ky’eby’obusaatsi nibakyeta ekiro kya Yakobo ky’obusaatsi. Yakobo n’eiziina ryakabiri eririkumanyitsa Israeli. Aho norahuka kukyetegyereza ku obwaire bwa Yakobo bw’obusaatsi nibwe bwaire bw’eby’obusaatsi oburi kugambwaho ngu tihariho bwaire oburi nkabwo (Yeremia 30:7). Omuri Danieli 12:1 nihagira hati; “haryabaho obusaatsi bwaingi obutakabahoga kuriga ihanga ryabaho.” Omuri Matayo 24:21 nihagira hati; “haryabaho obwaire bw’obusaatsi obutakabahoga kuriga ensi ebaho n’okuhitsya eriizooba, kandi obutarigarika kubaho.” Egi emishororongo yoona neshoboorora obunaku bumwe.

Omubwaire bw’obusaatsi Ruhanga naija kukoresa “Babeluuni” kufubira Israeli aha bw’eby’okushaisha byaabo.

Tuherize kureeba ngu omubweire bw’emperu, omugabe w’omumatemba naija kutahirira Israeli (omuri Midro Isiiti). Omugabe w’omumatemba niwe omwe orikwetwa “omugabe wa Babeluuni” orikweija kutegyeka Bugirimaani, Buraaya n’okwetorora ensi.

Ogu mugabe naija kwetoroza Yeruzalemu abaserukare, azibire ekitambo ky’obutosha, ateeke ekirikuzira ekirikuhwerekyereza omumwanya ogurikwera, ebiro 30 obunaku bw’obusaatsi butakatandikire. Kuriga omuri obwo bweire, amahanga g’ab’Israeli nigaza kuteera entsibo.

Yetegyereze Hosea 5:5-6:

“Amaryo gakanyire omumaisho ga Israel, nahabwekyo Israeli na Efuraimu nibaija kuteera entsibo, baryagyenda n’amatsyo gaabo g’ente n’ag’entaama kusherura Mukama, kwonka tibarimubona, ahabw’okuba abarugireho.”

Okyetegyereze kurungi eki emishororongo egi erikushoborora. Amahanga g’ab’Israeli nigaza kuteera entsibo omukanya niko kamwe na Yuda.

Kwonka batakagwereire kimwe nibaija kugyenda, “n’amatsyo gaabo g’ente n’ag’entaama kusherura Mukama kwonka tibarimubona.” Nibaija kutandika kuhonga enyamaishwa omuri Yeruzalemu, kwonka Mukama abyange. Reero okutamba ebitambo kwemerezibwe, ebiro 30 eby’obusaatsi bitakatandikire, reero bwanyima y’ebyo biro Yuda na Israeli bateere entsibo.

Ahabw’okuba bakanga kukuratira Ruhanga, bazaara abaana batashemaire. Nibaija kumirwa juba n’emisiri yaabo, okwezi kutakabonekire (Hosea 5:7).

Omugabe w’omumatemba naija kuba yaayehinguririze Yeruzalemu abaserukare, n’ahabw’ekyo omuri obwo bwaire, omugabe ogu naija kugira obushoborozi ahari Yuda (Ihanga rya Israeli omuri Midro Isiiti). Kwonkashi noogira, ab’Israeli abari Bungyereza, Furansa, Holandi, Norway, Swedeni nibakubatwariza bata? Kandishi abari Kanada, Australia, Amerika, na Sautsi Afrika?

Amahanga g’amaani nka Rasha na chaina kugarareebe amahanga aga gatandika kuteera entsibo, nigaza kukoraki? Nigaija kureeba ngu gabona omugisha gw’okwegaruriza emyanya yaago.

Omuri Danieli 11:44 nihagamba aha mugabe w’omumatemba bati; ” kwonka bwanyima amakuru agariruga burigwa Izooba (Asia) n’aha bukizi-bwa-bumosho, garamwemereza omutima, ahurire ekiniga kingi kuhwerekyereza beingi n’okubamariraho kimwe.”

Aho omugabe w’omumatemba kiramwetagyitsa kukora n’amaani kusingura emyanya myeingi nkoku kirikubatsika, amahanga agandi nka Rasha na Chaina gatakabitahiremu. Abaserukare ba Buraaya “baryagyenda n’ekiniga kingi, kuhwerekyereza beingi n’okubamaraho.” Obeire washomire ngu b’ibiri bya kashatu by’ab’Israeli baryahwerekyerezibwa, reero kimwe kya kashatu batwarwe omubuzaahe, omukutandika kw’eby’obusaatsi bweingi (Ezekieli 5).

Ekitabo ky’Okushuuruurirwa 18:12-17, nihashoborora oku Babeluuni ereija kuba ey’amaani omubwaire bw’obusaatsi, kandi nihahamya ngu Babeluuni egi, neija kuba neeguza abantu n’emitumbi” (Okushuuruurirwa 18:13).

Obwaire bw’obusaatsi nibwaija kumara emyaka 21/2, reero ekiro kya Mukama waitu kitandike.

Ekiro kya Mukama waitu nikiiha?

Ebiro by’obusaatsi kubirihwaho biti, haryarebekaho obumanyitso omwiiguru, burikurangirira ekiro kya Mukama waitu. Kuratiriza emishororongo egi, oreebe eky’eri kushoborora:

Omuri Matayo 24:29 nihagira hati:

“Bwanyima y’okubonabona kw’omubiro ebyo, ahonaho eizooba riryahinduka omwiruma, n’okwezi tikuryaaka, n’enyonyozi ziryaragara niziriga omw’iguru, n’eby’amaani eby’omwiiguru biryatengyesibwa.” Yoweri 2:30-31:

“Kandi ndayoreka eby’amahano omwiiguru n’omunsi, eizooba riryahinduka omwiruma, n’okwezi kuhinduke eshagama, ekyo kiro kikuru kya Mukama waitu kitakahikire.

Okushuuruurirwa 6:12-17 nihagira hati:

Kuyabambweire akamanyitso ka mukaga, nareeba omutsitsa mwiingi, eizooba ryairagura nk’ekigunia ky’obwoya burikwiragura, n’okwezi kwahinduka eshagama. Enyonyozi z’ahaiguru zaagwa aha nsi, nk’oku omutiini guragaza ebijuma byagwo bitakahitsize, gwatengyesibwa omuyaga mwiingi. N’eiguru ryaihwaho nk’oku omuzingo gw’ekitabo guzingwa, kandi enshozi zoona n’ebirwa byona byaihwa omumyanya yaabyo. Kandi n’abagabe b’ensi, n’abakungu, n’abakuru b’engabo, n’abatungi, n’ab’obushoborozi n’abantu boona, abahuuku n’ab’obusingye, bayeshereka omu nyanga, n’omu nkiri z’omu nshozi nibatakira enshozi n’enkiri bati: mutugwere, mutusherekye omumeisho g’ogwo oshutami aha kitebe ky’obukama, n’ekiniga ky’omwana gw’entama; ahakuba ekiro kikuru ky’ekiniga kyabo kyahika, noha orikubaasa kukyemera?

Ekiro kya Mukama kiry’eija haheza kuhwaho obweire bw’obusaatsi. Haza ahakiro ekyo, Ruhanga aryafubira amahanga agatari g’ab’Israeli aha bw’amaryo n’okwanga kumuhukiriza (Isaaya 2:10-21; Obadiya15; Malakyi 4:1,5).

Emishororongo egi n’eyoreka ku ekiro kya Mukama waitu n’eky’okumara omwaka gumwe:

  1. Isaaya 34:8; “Ahabw’okuba eryo izooba n’eri Mukama arihooreraho enzigu, n’omwaka gw’okubazumurira ebi bakoreire Sayuuni.”
  2. Isaaya 61:2: “kurangirira abantu omwaka gwa Mukama ogw’embabazi, n’eizooba eri Ruhanga waitu arihooreraho enzigu, kuhumuriza boona abarikuganya.”
  3. Isaaya 63:4: “Ahabw’okuba ku naabaire mmaririire kutaho eizooba ry’okuhooreraho enzigu, omwaka gwangye gw’okucungura gwahika.”

Yetegyereze kugira ngu ekiro kya Mukama waitu nibagaruka bakyeeta “Omwaka Gwa Ruhanga Ogw’embabazi.” Bagaruka bakyeeta “Omwaka Gw’okucungura.” Ruhanga kwaratandike kufubira amahanga aha kiro kya Mukama waitu, Israeli naija kugarukira Ruhanga (Ebiragiro 4:29-31). Omuri ogu mwaka, Ruhanga araiha Israeli omuzaahe omuri Babeluuni atakagicwekyereize (Isaaya 51:6). Ruhanga aryarundana ab’Israeli boona na Yuda, abaihe omu mahanga agi barumu, abate omw’eihanga rya Israeli omuri Midro Isiiti (Ebiragiro 30:1-10; Yeremia 16:14-18; Ezekieli 20:33-44).

Aha kiro kya Mukama waitu, enzamba mushanju ez’omu kitabo ky’Okushuuruurirwa zirateerwa (Zefania 1:14-16; Yoweri 2:1; Okushuuruurirwa 8; 9; 11:15-19). Enzamba y’aha muheru ku eriteerwa, Yesu Kristo aryaaba omugabe omunsi (Okushuuruurirwa 11:15).

Omukyegyeso ekiraije, noija kweega abu Ruhanga ararinde omubwaire bw’obusaatsi n’aha kiro kya Mukama waitu, n’ekirakurateho Yesu Kristo yaaheza Kuba omugabe.

Ekyegyeso ekirikukurataho: Haryabaho okuhindirwa kw’emiri (Rapukya) oby’obusaatsi bitakabaireho