Nihaija Kubahoki Hatakabaireho Okugyezibwa Kwingi

Ruhanga akakoresa ebitabo byingi bitarikushushana omuri Baibuli, arikutugambira ebiribaho emperu etakahikire. Ku orakuratire ebyegyeso ebi n’obwegyendesereza, okashaba Ruhanga okwetegyereza, noija kucenga kurungi ebiraija kubaho emperu etakahikire.

Egi n’emigane y’okubanza erikutugambira aha birikwija kubaho emperu etakahikire:

• Ebi Yesu yaagambire omuri (Matayo 24, Mariko 13, Luka 12)
• Ekitabo ky’Okushuuruurirwa
• Ekitabo kya Danieli eky’aha muheru
• Emigisha n’emikyeeno y’omu Baleevi 26.

Kutandika na Matayo 24.

“Reero Yesu akashohora yaruga omuri Nyaruju, abatendekwa be bamuhikaho kumwereka Nyaruju oku eyombekire, n’amabaare g’obuguzi bwaingi.” Yesu nikwe kubagarukamu nagira ati, “nimureeba oku amabaare g’ahari Nyaruju gatembekyeriine kurungi, buzimazima nimbagambira nti; tihaine ibaare narimwe eririkwija kutsigara ritashenyukire ahari Nyaruju egyo eyi murikureeba” (Matayo 24:1-2). Kristo akatebereza ngu Nyaruju y’aba Yudaaya neija kushenywa kandi kikabaho hahwaireho emyaaka makumi ana. Omuri 70AD, Aba Rooma bakahamba Yeruzalemu, bashenya Nyaruju nkoku Yesu Kristo yakiteberaize kuba.

Abatendekwa ba Kristo bakatangarira entebereza ye, bamubuuza obwaire obu eki kirabeho:

kuyabaire ashutami aha rushozi Zaituni, abatendekwa be, bamuhikaho omukihama bamubuuza bati, “tugambire, ebi nibikuhikirira ryaari? Kandi nitukimanya tuta ngu oriheihi kugaruka aha mperu?” (Omushororongo gwa kashatu)

Okuhanuura okurikukurataho nikushoborora burikimwe nk’oku kiri. Kristo akabanza yaabagambira ebirabahikyeho omubwaire bwaabo. Kandi bimwe ahabiyaagambire, bikabahikaho emyaaka kikumi eyabandize Kristo aherize kuzooka. Kwihaho Yesu Kristo akatusigira obumanyitso oburibaho atakagarukire aha mperu (omushororongo gwa kashatu).

N’ahabwekyo ebi nibyo Yesu yaatwerekire ngu biry’abaho atakagarukire

Akamanyisto k’okubanza: Omurangi w’ebishuba okwegyesa enyikiriza etahikire.

“Mube baakareebi hatakagira owabahabisa, ahabwokuba baingi nibaaija Kweija omw’iziina ryangye barikweyeta Kristo, kandi baryahabisa baingi” (Matayo 24:4,5).

Kristo akaha okurabura ngu baingi baraija omw’iziina rye, haza bakorese iziina rye kuhabisa abandi. “Aba nibaija kugira ngu Yesu ni Kristo, kandi “babiihe abantu ngu n’abakurasi be,” haza babiihe abantu n’enyegyesa egwiire, etarikushushana n’ebi Baibuli erikwegyesa. Akamanyiso k’okubanza nikarebeka kuba katandikire obu ediini zatandika kubaho. Enyikiriza etahikire neija kuba ey’amaani kandi ey’obushoborozi, haza ehabise baingi. Eki tikirikwija kukorwa n’obunafu, kureka nikyaija kutwaara akanya kakye.

Nitumanya tuta?

1. Ngu aka n’akamanyitso, akarikwereka ngu Kristo arihaihi kugaruka? Akamanyiso nikimanyisa ekintu ekirikubaasa kureebwa n’amaisho, kandi kitegyerezibwa.
2. Kristo akagira ngu byoona ebiri kugambwa omuri Matayo 24:3-31, nibiza kuhikirira omukanya kakye.

Yetegyereze Matayo 24:32-34:

“Kambegyese eki kuriga aha muti gw’omutiini nk’ekyokureberaho, eitaagi ryaagwo kuryoroba, ryatooka amababi, mumanya ku omwaka guri heihi. Mutyo nimwe kumurireeba ebyo byoona nibibahikaho, mumanye ku obukama bwa Ruhanga bwabahikire haihi aha rwigi.”

Yesu Kristo akagira ati; “kumurareebe ebindikubagambira,” ebirimu obumanyiso obuyaagambire, emperu n’okugaruka kwe biraaba byahikire “haihi aha rwigi.” Akagaruka yaagira ngu obunaku oburaabe buriho obumanyiso obu bwakutandika kwaija, tiburihwaho atakaizire (Matayo 24:34). N’ahabwekyo kumurareebe enyikiriza egwiire yagira obushoborozi bwaingi, ebindi nibyaija kurahukaho. Nikirungi kwetegyereza obu akamanyiso k’okubanza kararebeke. Kukaraije baingi nibaija kuhabisibwa. N’ahabwekyo oyereinde otabaihwabaihwa. Oine kwetegyereza kurungi Baibuli, kugira ngu oyetegyereze enyikiriza ehikire n’erikweyeta ehikire, kandi etakahikire.

Okwetegyereza ebirikukwata aha kamanyiso k’okubanza

Waaza kushoma ebintu ebi okubiri kukuratana, oshemaire kwetegyereza omuri Mariko 13, Luka 21, n’ekitabo ky’Okushuuruurirwa. Omuri Luka 21:8, nihatworeka ngu abarangi b’ebishuba nibaija kutubiiha ngu, “obwaire bwairira haihi,” nibaija kutubaiha ngu okuhanuura kwatandika kuhikirizibwa. Hati banza oyebuuze ahari eki, ndiyo ninkushomesa omw’iziina rya Kristo, naiwe omwe, ndiyo ninkugira ngu Yesu ni Kristo omujuni, kandi ngu obwaire bwe bw’okwiziramu buri haihi kuhika. Hoona oshemaire kunyesiga? Ngaaha, toshemaire kwaikiriza weena orikukwegyesa omw’iziina rya Kristo. Okwihaho, eki oshemeraire kukora, n’okushushanisa ebiyakwegyesa n’ebihandikire omuri Baibuli. Buri ky’orahurire, oronde obuhame bwaakyo omuri Baibuli, kandi oshabe Ruhanga okuhe okwetegyereza, batakakubaiha!

Hati banza oreebe akamanyiso k’okubanza ak’ebiro by’emperu aku turikushanga omukitabo ky’Okushuuruurirwa. Haza oijukye ngu ekitabo eki, nakyo nikigamba aha biraije kubaho emperu yaaza kuhika. Ebiri omukitabo ky’Okushuuruurirwa, nibishushana, n’ebi Yesu yaagambire kubaho emperu etakahikire, ebi turikushanga omuri Matayo 24, Mariko 13, na Luka 21.

Okushuuruurirwa 6:1-2 nihagira hati;

“Bwanyima nareeba omwana gw’entaama naabambura akamanyiso kamwe ahari obwo mushanju, nahurira ekihangirwe kimwe ahari ebyo ebiine amagara nikigamba n’eiraka nk’ery’okuhinda kw’enkuba, kiti: Ija! Ku naimukize amaisho, nareeba ebaraasi erikwera, kandi owaabaire agishutamiho akaba aine obuta. Akaheebwa ekirunga ngu agyende naasingura omu kurwaana kandi ngu abone kusingurira kimwe.”

Owabaire navuga egi embaraasi nooha?

Aha muheru gw’ekitabo ky’Okushuuruurirwa nitushangayo oku Yesu arikwaija kugaruka arikuvuga embaraasi erikwera. Araija kusingura n’okurwanisa amahanga agari murwanisa (Okushuuruurirwa 19:11,15).

Mbweenushi tugire ngu omuvugi w’embaraasi ow’omu Kushuuruurirwa 6:1-2, nawe ni Kristo?

Ngaaha, ogu ni Kristo ow’ebishuba!

Oijukye omu Kushuuruurirwa 6, Yesu akashoborora ahari byenyine ebiyagambire omuri Matayo 24. Akamanyiso k’okubanza omuri Matayo 24, kukaba kuri okubaiha abantu n’enyikiriza etahikire. Omuvugi w’okubanza w’embaraasi tari Kristo kureka ni antikristo.

Omuri 1 Yohaana 2:18, nihagira hati, “…nk’oku mwahuraire ngu nihenda kwija Antikristo, na mbwenu haizire abaantikristo baingi”…

Enyikiriza nyingi zaizire nizihakanisa Kristo, kandi n’ezindi nizeyongyera kwaija, kwonka Baibuli netugambira ngu hariho omuntu orikwetwa Antikristo oriyo naija. Kwonka Baibuli terikushoborora byingi ahari ogu muntu, neetugambira ngu arihaihi kwaija kwenda kweeteka omubigyere bya Kristo ow’amazima.

Ijuka Yesu Kristo akaha okurabura ku baingi baraija barikukoresa iziina rye, haza bakahabisa baingi. Hanu omukitabo ky’Okushuuruurirwa 6:2, nihashoborora ahari Antikristo.

Haza ebi nibyo barikushoborora aha muntu ogwe omuri Okushuuruurirwa 6:2:

1. Naija kushutama aha “mbaraasi erikwera,” nk’oku Kristo arigaruka navuga embaraasi erikwera kucungura ensi. Baingi nibaija tutekateka ngu ogu muntu, yayoherezibwa Ruhanga kucungura ensi.
2. “Owabaire agishutamireho akaba aine obuta.” Naija kurwaana entaro nyingi kandi azisingure.
3. “Akaheebwa ekirunga,” omuntu ogu naija kutegyeka eihanga nari amahanga maingi.
4. “Kandi akaija naasingura omukurwana entaro,” omuntu ogu, naija kukoresa abaserukare kusingura entaro nyingi.

Omu Kushuuruurirwa 13, nitwegamu ku ogu mutegyeki orikwetwa “ekinyamaishwa,” naija kukwatanisa na mukuru w’enyikiriza egwiire orikwetwa “omurangi w’ebishuba.” Ekinyamaishwa nikyaija kukoresa amahe kujanjaza enyikiriza etahikire, n’okugigyema omu bantu, reero omurangi w’ebishuba naija kwegyesa abantu okuramya ogu muntu nka ruhanga (Okushuuruurirwa 13:4, 15; 2 Abatesalonika 2:4; Ezekieli 28:2; Danieli 11:36-39).

Antikristo ogu aine amaziina maingi omuri Baibuli. Omu (kushuuruurirwa 13:4-5), nibamweta “ekinyamaishwa.” Omuri (2 Abatesalonika 2:3-4) bamweta “enkozi y’ebibi.” Omuri (Danieli 11:40), bamweta “omugabe w’omumatemba.” Omuri (Danieli 7:8, 24-25) bamweta “akahembe akakye.” Omuri (Danieli 9:26), bamweta “omutegyeki orikwaija.” Omuri (Ezekieli 28:2-10), bamweta “omugabe wa Tyre.” Omuri (Isaaya 14:3-11), nibamweta “omugabe wa Babeluuni.” Omuri (Yeremiya 50:17-18), bamweta “Nebukedeneeza.”

Waaba otarikumanya ihanga eri omutegyeki ogu araija kukomokamu, oshome ekyegyeso ky’okubanza.

Guma noreebuza omutegyeki omuri Buraaya oine enkwatanitsa n’enyikiriza eine amaani n’obushoborozi bwaingi, orikugyenda naarwanirira amahanga agandi kugacungura. Aka niko kamanyiso aki Yesu Kristo yatuhaire kumanyiraho ku emperu erihaihi.

Noija kweega byaingi ebirikukwata ahari antikristo n’omurangi w’ebishuba omu byegyetso eby’omumaisho.

Akamanyitso ka kabiri: Entaro nyingi hamwe nokuranga kw’entaro.

Kandi muryahurira entaro nyingi n’okuranga kwazo, mwerinde mutaryemereza emitima, ahabw’okuba ebyo tibiribura kwaija kwonka emperu yo eraaba etakahikire. Ihanga rirateera erindi ihanga, n’obugabe buryateera obundi bugabe…(Matayo 24:6-7). Okimanye kugira ngu Yesu akashoborora ngu ebi kubiribaho, “emperu eraaba etakahikire.” Ebintu ebi birahika hakirikuburayo obwaire “emperu ekahika.”

Aka niko kamanyitso kenyine akari kushobororwaho omu Kushuuruurirwa 6:3-4:

ku yaabambwire akamanyitso ka kabiri, nahurira ekihangirwe ekya kabiri aha biine amagara, nikigira kiti; Ija! Harugayo embaraasi endaijo erikutukura, owabaire agishutamiho yaikirizibwa kwaiha obusingye omunsi; kandi yaahebwa rurara mpango.

Eki tikirikugamba aha ntaro eziturikureeba, akamanyitso aka nikaija kureebwa butunu. Nihaija kubaho entaro kwetorora ensi, ekiraije kutuhitsya aha bumanyitso obundi bubiri.

Akamanyitso ka kashatu: Enjara.

Akamanyitso akarikurataho nitukashanga omuri Matayo 24:7 kandi nihagira hati; “haryabaho enjara y’amaani.”

Enjara egi negaruka eshobororwaho omu Kushuuruurirwa 6:5-6:

Kuyaabambwaire akamanyitso ka kashatu, nahurira ekihangirwe ekya kashatu aha biine amagara nigira kiti: ija! Ku naimukize amaisho, nareeba embarasi erikwiragura. Kandi owabaire agishutamiho ak’aba aine eminzaani omungaro ze. Nahurira nk’eiraka ahagati y’ebihangirwe ebiine amagara ebina, nirigira riti: “Endengo y’engano n’edenaari, n’endengo ishatu za sayiri n’edenaari, kwonka amajuta na viinyo otabishiisha.”

Yohaana arikuza kutunga okworekwa oku, edenaari emwe, gukaba guri omushaara gw’orunaku rwoona (Matayo 20:2). Entaro ez’akamanyitso ka kabiri nizaija kureeta okucurama omuby’empaiha, enjara n’okwaitwa kubi.

Akamanyitso ka kana: Endwara na Rufu.

Ebirikugambwa omuri Matayo 24:7, “ni ebihikirizi, emitsitsa omumyanya etari emwe n’emwe.”

Okushuuruurirwa 6:7-8 nihagira hati;

Kuyabambwaire akamanyitso ka kana, nahurira eiraka ry’ekihangirwe ekya kana nikigira kiti:ija! Ku naimukize amaisho, nareeba embarasi kitsa, n’owabeire agishutamiho ak’aba nayetwa rufu, okuzimu yaamukuratira, bahebwa obushoborozi aha kicweka kimwe kya kana ky’ensi okwiitsa abantu rurara, n’enjara, na rufu, n’enyamaishwa mbi z’omunsi.

Entaro n’enjara nibyaija kureeta okujanjara kw’oburwaire, enyameishwa mbi nizaija kutahirira abantu zirikuronda eby’okurya (Abaleevi 26:22), emitsitsa neija kwongyerera aha kufa kw’abantu.

Ebirabanze kubaho omu bumanyitso obw’okubaza, nibyaija kuretera kimwe kya kana ky’abantu aba omunsi kufa. Ku oraija kureeba ebicweka makumi abiri na bitaano ahari kikumi by’abari omunsi baafa, omanye ngu akamanyitso k’okubanza kahikirira. Matayo 24:8 nihagira hati; “kwonka ebi byona eraaba eri entandikiriro y’obusaatsi.”

##Akamanyitso ka kataano: Engiri ey’amazima kandi ehikire, neija kubururwa kandi egambirwe.

Yesu akashoborora ekiraahikye aha bakuratsi be:

Obwaire obwo, muryaheebwayo omu bobushoborozi babaite, nimwaija kwangwa ab’amahanga goona ahabw’eizina ryangye (Matayo 24:9).

Eki nikyaija kuhikirira aha rubaju rw’obumanyitso buna obw’okubanza. Omuri Luka 21:12 nihashoboorora kurungi aha kintu ekyo:

Ebi byoona bitakabaireho, nibaija kubahiganitsa, babate omunkomo babashungye, babatware omumaisho g’abaramuzi n’abagabe nibabatura iziina ryangye.

Eki kikaba aha bakuratsi ba Kristo abakare, kandi nikiza kugaruka kibeho aha mperu. Enyikiriza etahikire kweragyire obushoborozi, neija kuhiganisa ab’enyikiriza ey’amazima. Abakuratsi ba Kristo abahikire nibaija kutwarwa omubihome, n’omumaisho g’abaramuzi kucwerwa emanja. Ogu nigwe guraabe omugisha gwaabo kuburira abategyeki b’amahanga nka baakareebi (Luka 21:13-15). Obu nibwaija kuba obwaire bw’okugyezibwa aha bikiriza ab’amazima.

Abamwe nibaija kucendeza aha nyikiriza n’emitwarize, kandi abandi nibaija kurangirira ebihikire bataine kutiina kwoona. Bamwe nibeija kureka enyikiriza yaabo, kandi abandi bareebye batahi baabo n’abanyabuzaare baabo (Matayo 24:10-13). Omubwaire obwo, abakurasi ba Kristo ab’amazima, nibaija kuheza okuburira engiri ehikire. Kristo akagambira abakuratsi be ati, “mugyende omunsi yoona, murangirire amakuru marungi ahari buri kihangirwe kyoona” (Mariko 16:15). Matayo 24:14 nihagira hati; “Amakuru marungi g’obukama bwa Ruhanga nigaija kurangirirwa omunsi yoona, obujurizi buheebwe omu mahanga goona, reero emperu ebone kwaija.”

N’ahabwekyo oreebe abarikurangirira engiri ehikire, abarikwangwa ab’amahanga goona ahabwokwanga kwiikiriza enyikiriza egwiire. Abo nibo bariba bari abakuratsi ba Kristo abahikire, ka guruupu kakye ak’oshemeraire kuba orimu.

Ebyo nibyo biraija kutuhitsya aha bwaire obu Baibuli erikweta “emperu.” Noija kweega byaingi ahari ekyo, omukyegyeso ekirikwaija.

Ekyegyeso ekirikukurataho: Enkuratane y’ebiribaho aha mperu